RAIS MAGUFULI AWAAPISHA MAJAJI WAPYA WA MAHAKAMA YA TANZANIA

Jaji Kiongozi Mhe. Ferdinand Wambali akila kiapo mbele ya Rais wa Jamhuri ya Muungano wa Tanzania Dkt. John Pombe Magufuli (hayupo pichani)wakati wa hafla ya uapisho ya Jaji Kiongozi na Jaji wa Mahakama ya rufani leo Ikulu Jijini Dar es Salaam.

Jaji wa Mahakama ya Rufani Tanzania  Mhe. Shaban Lila akisaini hati ya kiapo mbele ya Rais wa Jamhuri ya Muungano wa Tanzania Dkt. John Pombe Magufuli wakati wa hafla ya uapisho ya Jaji Kiongozi na Jaji wa Mahakama ya rufani leo Ikulu Jijini Dar es Salaam

Rais wa Jamhuri ya Muungano wa Tanzania Mhe. Dkt. John Pombe Magufuli akiwa katika picha ya Pamoja na Jaji Kiongozi Mhe. Ferdinand Wambali (kulia) na Jaji wa Mahakama ya Rufani Tanzania Mhe. Shaban Lila baada ya kuwapisha leo Ikulu Jijini Dar es Salaam.

Rais wa Jamhuri ya Muungano wa Tanzania Dkt. John Pombe Magufuli akiwa katika picha ya Pamoja na baadhi ya viongozi wakuu wa nchi wakati wa  kutoka kulia ni Jaji Mkuu Mhe. Chande Othuman, Waziri Mkuu Mh. Kassim Majaliwa, Jaji Kiongozi Mh. Ferdinand Wambali, Jaji wa Mahakama ya Rufani Tanzania Mhe. Shaban Lila na Makamu wa Rais Mhe. Samia Suluhu

Mtendaji Mkuu wa Mahakama ya Tanzania Bw. Hussein Kattanga akimweleza jambo Waziri Mkuu wa Jamhuri ya Muungano wa Tanzania Mhe. Kassim Majaliwa wakati wa hafla ya uapisho ya Jaji Kiongozi na Jaji wa Mahakama ya Rufani Tanzania leo Ikulu Jijini Dar es Salaam

 Rais wa Jamhuri ya Muungano wa Tanzania Mhe. Dkt. John Pombe Magufuli akisalimiana na Mtendaji Mkuu wa Mahakama ya Tanzania Bw. Hussein Kattanga. Kutoka kulia ni Jaji Mkuu Mhe. Mohamed Chande Othman, Waziri Mkuu wa Jamhuri ya Muungano wa Tanzania Mhe. Kassim Majaliwa na Katibu Mkuu Kiongozi Balozi, Mhandisi John William Kijazi.

Jaji Kiongozi Mhe. Ferdinand Wambali (kulia) na Jaji wa Mahakama ya Rufani Tanzania  Mhe. Shaban Lila wakisubiri kuapishwa leo Ikulu Jijini Dar es Salaam.

Na. Magreth Kinabo - Dar es salaam.

Jaji wa Mahakama ya Rufani Tanzania, Mhe. Shaban  Lila na Jaji Kiongozi wa Mahakama Kuu ya Tanzania, Mhe.  Ferdinand Wambali, wamesema kwamba watafanya kazi kwa ushirikiano na majaji wenzao ili kuhakikisha kwamba mashauri yanasikilizwa   kwa wakati, ikiwemo kuwa karibu na wananchi.

Kauli hizo zimetolewa leo na majaji hao, mara baada ya kuapishwa na Rais wa Jamhuri ya Muungano wa Tanzania Mhe.  Dkt. John Pombe Magufuli   katika hafla fupi iliyofanyika Ikulu jijini Dares Salaam.

Rais Magufuli amewaapisha Majaji wa Mahakama hizo kwa mara ya kwanza tangu aingie madarakani Novemba 05, 2015.

 Akizungumza  baada  kuapishwa Jaji Lila alisema  atafanya kazi ya  kusimamia na kuongeza nguvu ili kuhakikisha  mashauri  yaliyopo mahakama ya Rufani (T) yanasikilizwa na kutolewa maamuzi kulingana na muda uliopangwa.

Kwa upande wake Jaji Wambali, aliongeza kwamba atashirikiana na wananchi wote na pia katika utendaji kazi wake atazingatia sheria, kanuni na taratibu, ikiwemo kutofanya upendeleo wa husda.

“Nitafanya kazi kwa bidii, lazima tushirikiane na wananchi wote.  Nitahakikisha Mahakama inakuwa karibu na wananchi kwa kuwafikia maeneo walipo ili kuwaondolea kero ya kutumia muda wa siku mbili kwa ajili ya kuhudhuria kesi mahakamani hususani kipindi cha masika. Hivyo tutatumia Mahakama za kutembea,” alisema Jaji Wambali.

 Akitolea mfano wa muda  wa kusikiliza kesi kwa mujibu wa kiwango cha kimataifa  kesi za madai  zinatakiwa  zisidi kipindi cha miaka miwili  na shauri lisizidi  miezi 18. 

Alifafanua kwamba kwa upande wa mahakama za mwanzo atajitahidi kutatua changamoto zilizopo mfano kuongeza idadi ya mahakama na fedha ili kuongeza miundombinu ya kuwafikia wananchi.  

Hafla hiyo, ilihudhuriwa na Makamu wa Rais wa Jamhuri ya Muungano wa Tanzania, Mhe. Samia Suluhu Hassan na Waziri Mkuu wa Jamhuri ya Muungano wa Tanzania, Mhe. Kassim Majaliwa, Jaji Mkuu wa Tanzania, Mhe. Mohamed Chande Othman na Watendaji wa mahakama mbalimbali, baadhi ya majaji wa Mahakama ya Rufani Tanzania, Mahakama Kuu yaTanzania, Mkurugenzi wa Mashtaka nchini (DPP), Biswalo Mganga, na baadhi ya  wageni mbalimbali. 

Kabla ya uteuzi huu, Mhe. Jaji Lila alikuwa Jaji Kiongozi wa Mahakama Kuu ya Tanzania na Mhe. Wambali alikuwa Mkuu wa Chuo cha Uongozi wa Mahakama-Lushoto (IJA).