Mrema awaonya Polisi Jamii wanaojichukulia sheria mikononi

Na Pius Nkanabo, Dar es Salaam,

Mwenyekiti wa Bodi ya Parole, Augustino Lyatonga Mrema amewaonya  polisi jamii kuacha kujichukulia sheria mikononi kwa kuwapiga raia na kuwalazimisha wasichana kufanya nao ngono kilazima. 

Mazungumzo hayo yamefanyika leo Jijini Dar es Salaam katika viwanja vya Tandale, Mtaa wa Pakacha ambapo Mwenyekiti wa Bodi hiyo ameahidi kutatua kero hiyo kwa kuwachukulia hatua wananchi watakaojichukulia sheria mikononi.

“Polisi Jamii wamekuwa ndiyo tatizo kubwa kwa wakazi wa eneo hili kwa kujichukulia mamlaka ya kuwatesa na kuwanyanyasa wananchi hivyo, natoa tamko kwa yeyote atakae bainika kumkamata mwananchi yeyote bila sababu ya msingi achukuliwe hatua za kisheria”, alisema Mrema.

Mhe. Mrema ameongeza kuwa Mkuu wa Mkoa wa Dar es Salaam, Poul Makonda ndiyo Mwenyekiti wa Usalama wa Mkoa huu hivyo ni lazima amchongee kwa Rais kwa kuwa ameshindwa kuifanya vizuri kazi yake ya kusimamia Jeshi la Polisi ipasavyo.

Aidha, Mwenyekiti wa Bodi hiyo ameahidi kuwasaidia wanawake kwa kuwapa mikopo na kuwahakikishia usalama wa biashara zao kwa kuwa waanawake wengi wamekuwa wakinyanyaswa na kulazimishwa kufanywa ngono bila ridhaa yao.

Pia amewaonya wale wote wanaowachukua wasichana kwa ajili ya kufanya kazi za nyumbani kutoka Mikoa mbalimbali na kuwatelekeza au kuwapa kazi tofauti na walizowaitia watachukuliwa hatua kali za kisheria.