SERA NA SHERIA MPYA KULINDA MASLAHI YA WASANII

Wizara ya Habari, Utamaduni, Sanaa na Michezo inakusudia kuandaa Sera Mpya ya Sanaa kwa lengo la kuunda sheria itakayosimamia maslahi ya wasanii nchini.

Kauli hiyo ilitolewa jana na Waziri wa Habari,Utamaduni,Sanaa na Michezo Mhe. Nape Nauye alipokuwa akizungumza katika kipindi cha TUNATEKELEZA kinachoratibiwa na Idara ya Habari MAELEZO na kurushwa na Televisheni ya Taifa (TBC 1).

 “Sera ya Utamaduni iliyopo sasa ina mapungufu  kwani haijaeleza vizuri namna inavyowanufaisha wasanii na kusimamia kazi zao '’  Alisema Mhe. Nape. 

Alisema wizara inaendelea na mchakato wa kuandaa Sera ya Sanaa ambayo itakuwa suluhisho katika uundaji wa sheria nzuri itakayosimamia kazi za wasanii na kubainisha kuwa mchakato huo utawashirikisha wadau mbalmbali.

Mhe. Nape alieleza kuwa serikali inatambua uwepo wa changamoto mbalimbali zinazowakabili wasanii katika uendeshaji wa biashara zao,  hasa kipato kidogo kisichoendana na kazi zao, kazi zao kuingiliwa na watu wasiohusika ambao wamekuwa wakijinufaisha wenyewe na uuzwaji  holela wa kazi za wasanii kutoka nje nchini.

Aliongeza kuwa ili kudhibiti vitendo hivyo wizara kwa kushirikiana na vyombo vya ulinzi na usalama imekuwa ikiendesha msako katika maeneo mbalimbali ili kuwabaini na kuwafikisha kwenye vyombo vya Sheria wale wote wanaohujumu kazi za wasanii hapa nchini.

Kuhusu Sekta ya Utamaduni alisema kuwa watanzania wanapaswa kujenga utamaduni wa kujituma na kuacha tamaduni ambazo ni kinyume na  maadili ya mtanzania hasa vitendo vya ukeketaji kwa watoto wa kike, ndoa za utotoni na baadhi ya wazazi kutosomesha watoto wa kike.

Aidha,alisema kuwa lugha ya Kiswahili inaendelea kukua kwa kasi kwa kuwa ni lugha ya kumi duniani na kuongeza kuwa bunge la Afrika Mashariki limepitisha azimio la kuitambua na kutumia lugha hiyo katika mikutano yake.

 Alitoa wito kwa wataalam wa lugha ya Kiswahili kuandika vitabu vingi zaidi vitakavyosaidia kuikuza lugha hiyo pia wasanii  kwenda katika vyuo vya sanaa kupata utaalam utakaowawezesha kufanya kazi zao katika ubora na mvuto zaidi.